Киләсе атнада Казанда татар теле һәм әдәбияты буенча Халыкара олимпиада узачак
Казанда 13–16 апрельдә татар теле һәм әдәбияты буенча XIII Халыкара олимпиада узачак. Татарстан Мәгариф һәм фән министрлыгы матбугат хезмәте хәбәр иткәнчә, анда Россиянең 30 субъектыннан һәм 5 чит илдән 500 кеше катнашачак.
Быелгы интеллектуаль бәйге татар шагыйре Габдулла Тукай иҗатына багышланган.
Олимпиадада республика һәм төбәкара этапларның җиңүчеләре һәм призерлары, шулай ук татар теле һәм әдәбияты буенча интернет-тестлар һәм әңгәмәләр узган катнашучылар көч сынашачак. Финалистлар жюрига Габдулла Тукай һәм Муса Җәлил иҗатына багышланган проектлар тәкъдим итәчәк.
Тантаналы ачылу чарасы 13 апрельдә 18:00 сәгатьтә Кәрим Тинчурин исемендәге Татар дәүләт драма һәм комедия театрында була. Төп конкурс сынаулары «Байтик» балаларны савыктыру-белем бирү комплексы базасында үткәреләчәк.
Олимпиада 16 апрельдә «Корстон» сәүдә-күңел ачу комплексында узачак Туган тел форумы белән тәмамланачак.