«Медосмотрга барганнар иде». Коточкыч авариядә 5 кеше үлгән, балалар ятим
Новосибирск өлкәсендә авариядә берьюлы 5 кеше үлгән. Бу турыда Тикшерү комитетына сылтама белән «Комсомольская правда» хәбәр итте.
Фаҗига 4 февральдә көндез була. Якынча белешмә буенча, «Мазда» машинасы Усть-Таркадан Татарскига таба бара, «ВАЗ» аңа каршы килә.
«Мазда» йөртүчесе идарәсен югалта, каршы як полосага чыга һәм «ВАЗ-2107» белән кара-каршы бәрелә, дигәннәр Россия Эчке эшләр министрлыгының Новосибирск өлкәсе буенча Баш идарәсендә.
«ВАЗ» машинасында 5 кеше бара – өчесе урында үлә, тагын икесен хастаханәгә илтәләр. Бу машина белән 48 яшьлек Андрей В. идарә иткән, янында 44 яшьлек хатыны Светлана була.
«Алар белән уртанчы уллары була. Алар өчесе дә үлде. Андрей юлда эшли, Светлана – кибеттә. Аларның тагын 2 баласы – кызы белән улы – ятим калды. Машинада аларның хезмәттәше һәм аның улы бара иде. Алар хастаханәгә медосмотрга бара торган булган бугай. Әллә кайтып киләләр, әллә баралар инде», – ди биредә яшәүчеләр.
Хатын-кыз һәм улы исән кала, алар хастаханәдә.
«Мазда» пассажиры да хастаханәгә эләккән. «Ул аңына килмәгән, хәле бик авыр. Аның белән машинада бергә яши торган ире була. Ул үлгән. Аларның кызы бар, хатынның беренче никахыннан улы бар. Аны бергә тәрбиялиләр иде», – ди авыл халкы.
«Мазда» йөртүче 42 яшьлек Владислав Г. та үлә. Социаль челтәрләрдәге мәгълүматлардан күренгәнчә, ул күптән түгел генә өйләнгән, диелә хәбәрдә.