Министр Фәйзуллин: «Орскидагы дамба 1 млрд сумлык түгел, ул туфрак өеменә охшаган»
Россиянең төзелеш һәм торак-коммуналь хуҗалык министры Ирек Фәйзуллин Оренбург өлкәсе губернаторы Денис Паслер белән бергә Оренбургта су басу куркынычы янаган зонада булды, объектларны карап чыкты. Алар килеп чыккан хәл турында, язгы су зыян китергән һәм җимерелгән шәһәрне торгызу чаралары турында фикер алышты.
Бу очрашуда министр Орскида хәтта дамба күрмәвен белдерде, дип яза «ЕАН».
«Орскида дамба 1 млрд сумлык түгел. Бу туфрак өеменә күбрәк охшаган», – дигән Ирек Фәйзуллин. Моңа кадәр басма, экспертлар нәтиҗәсе буенча, дамба төзелеше эшләренең бер өлеше кәгазьдә генә башкарылган икәнен, ә бүлеп бирелгән акчаның бер өлеше эзсез югалуы турында язган булган.
Ирек Фәйзуллин Денис Паслер белән бергә Черепанов урамындагы су баскан ярны карады. Фәйзуллин тикшерү кирәк булачагын әйткән.
«1 млрд сум кирәк булуы турында тиешле документ керттем. Су киткәннән соң, ул беренче ихтыяҗларга шунда ук юнәлдереләчәк. Һәм якын көннәрдә мин шулай ук салымнардан азат итү белән бәйле яңа законнар кертәчәкмен. Бу хәлгә эләккән гражданнарыбыз барлык региональ салымнардан азат ителергә тиеш, яисә 100 процентка азат ителергә, яисә алар 1 процентка кадәр калдырылырга тиеш», – дигән Ирек Фәйзуллин.
Министр хәзер су баскан территорияләрдәге кешеләргә никадәр авыр икәнен аңлавын әйтте һәм аларга һәртөрле ярдәм вәгъдә итте.
«Мин көн саен Президентка хәбәр итеп торам, һәм ул Оренбург өлкәсендә яшәүчеләргә төзекләндерүдә ярдәм күрсәтәчәген әйтте. Бәла федераль дип танылды. Федераль министрлар да килде. Торакны, мәктәпләрне, бакчаларны, социаль һәм мәдәни объектларны, Орскидагы музейны торгызырга кирәк булачак. Шуңа күрә һәр федераль министрлык үз вәкаләтләре кысаларында Оренбург өлкәсенә ярдәм итәчәк. Шуңа күрә региональ һәм федераль бурыч бар», – дип дәвам итте Фәйзуллин.
Ул торак-коммуналь хуҗалык хезмәтләре өчен түләүләр белән бәйле хәлгә аерым игътибар юнәлтте һәм губернатор Паслердан да шуңа игътибар итүен сорады. Денис Паслер федераль ярдәм алуын хәбәр итте. Зыян күрүчеләргә торакны капиталь ремонтлауга һәр квадрат метр өчен 7 мең сум биреләчәген расланды.
«Без торак арендасы белән бәйле мәсьәләгә кагылышлы карарны бер атна эчендә кабул итәчәкбез. Мин инде барлык параметрларны билгеләдем. Кече һәм урта бизнеска түләүләр һичшиксез булачак. Үзмәшгульләр өчен дә шул ук хәл. Бу кредитлар түгел, киресенчә, кече һәм урта бизнес фондын тулыландырырбыз», – дип өстәде Денис Паслер.
-
Орскида өе су астында калган Фәүзәнә апа: «Без хәзер бомжлар кебек, бернәрсәсез калдык»
-
Орск янындагы бердәнбер татар авылы Тукай, су басу сәбәпле, утрауда калган: «Ипи бетте!»
-
Замана «Дед Мазайлары» – Оренбург өлкәсендә су баскан урыннардан хайваннарны коткаралар