Уфасо кортасызь Россиянь финнэнь-угрань раськетнень кельтнень ды культуранть ванстомань кевкстематнень (эрзя)
Чадыковонь 24-це чистэ «Торатау» Конгресс-холлсонть ютавтови «РФ-нь финнэнь-угрань раськень Ассоциация» весе Россиянь общественной движениянь Советэнь Президиумонь выездной покш промксось.
Мероприятиясь ютавтови Федерациянь Советэнь сенаторонть, Ассоциациянь Президиумонь прявтонть Пётр Тултаевень прявтсо. Повесткань прявт темакс кармить Россиянь раськетнень вейкетьксчинь иентень тевтнень топавтоманть лувсо финнэнь-угрань раськетнень этнокультурань башка ёнксонтень лездамонь тевтне. Башкортостан Республикась кочказь промксонь таркакс а стяко. Регионось кементь иетнень перть невти раськетнень ютксо чарькодемань кеме лув, косо маритнень, удмурттнэнь, эрзятнень ды мокшотнень койтне-кирдатне кодазь весе Россиянь культурань кодонтень. 2025-це иестэ топодсть 20 иеть «Башкортостан Республикань финнэнь-угрань раськень Ассамблея» региононь общественной вейсэндявксонтень, конась меельце 20 иетнень перть кармась кельтнень ды койтнень ванстомань коряс важодемань прявт координаторокс.
Промксонть лувсо Россиянь Федерациянь субъекттнэнь представительтне пачтить аналитической докладт раськень теварсевкстнэнь топавтомадост, тонавтомань организациятнесэ тиринь кельтненень лездамодост ды этнотуризманть виевгавтомадонзо. Участниктне кортасызь НКО-нь грантонь лезксэнь максомань ёнкстнэнь, культурань контентэнь цифровизациянть, СМИ-тнень марто вейсэнь важодеманть ды од ломанень вейсэндявкстнэнь марто кеме сюлмотнень ладямонть. Истямо ламо профилень структурась лезды анокстамс аволь башка ушодкст, а федеральной ды региононь уровнятнесэ этнокультурной средань виевгавтомань кинь вейкине карта.